የእምነት አቋማችን

1. በማይበተን አንድነት፣ በማይጨፈለቅ ሦስትነት ሕልው ሆኖ በሚኖር ሥሉስ ቅዱስ (ሥላሴነት) እርሱም በእግዚአብሔር አብ ፣ በእግዚአብሔር ወልድና በእግዚአብሔር መንፈስ ቅዱስ አንድ አምላክ እናምናለን፡፡

2. የሚታየውንና የማይታየውን ፣ ረቂቅና ግዙፉን ዓለም በውስጣቸውም ያለውን ሁሉ ፈጥሮ በሚመግብ በሚጠብቅና በሚያስተዳደር በአንድ አምላክ በእግዚአብሔር እናምናለን፡፡

3. ጌታችን ኢየሱስ ክርስቶስ በተለየ አካሉ ቅድመ ዓለም በመለኮታዊ ባሕርይ ከአብ የተወለደ (የተገኘ) ድኅረ ዓለም ያለ አባት ከድንግል ማርያም በሥጋ በተወለደ ፣ ስለ ዓለሙ ሁሉ ኃጢአት በፈቃዱ ተላልፎ በመሰጠት በሞቱና በትንሣኤው የኃጢአት ይቅርታንና በስሙ በማመን ወደ እግዚአብሔር መንግሥት መግባትን እንደሰጠ እናምናለን፡፡

4. ከአብና ከወልድ ጋር ለዘላለለም በነበረ ቅዱስ መንፈሱ (መንፈስ ቅዱስ) መለኮታዊ ሀልዎት ግብር (ሥራ) እና ሥጦታዎች እናምናለን፡፡

5. መንፈስ ቅዱስ በነቢያትና በሐዋርያትም ዘመን እንደሠራ እስከ ፍጻሜ ዓለምም በቤተክርስቲያን በኩል ዛሬም እንደሚሰራ እናምናለን፡፡

6. ስድሳ ስድስቱ ቅዱሳት መጽሐፍት (መጽሐፍ ቅዱስ) እግዚአብሔር በተለየ መንገድና ራሱ ለዚሁ ሥራ በለያቸው ሰዎች በመንፈስ ቅዱስ መሪነት የተጻፈ ፣ ስኅተት የሌለበት ፣ የማይሻር ባለሥልጣን የሆነ የእግዚብሔርን ፈቃድ ዓላማና ኃሳብን የያዘ የሕያው እግዚአብሔር ቃል እንደሆነ እናምናለን፡፡

7. ድነት በክርስቶስ ኢየሱስ የመስቀል ላይ ሞት ብቻ በጸጋ ለሰዎች ሁሉ የተሰጠ በእምነት ብቻ የምንቀበለው የእግዚአብሔር ታላቅ ፍቅር መግለጫ እንደሆነ እናምናለን፡፡

8. በእግዚአብሔር ጸጋ ብቻ እንደዳንን ሁሉ ፤ በጸጋው መኖር እንደሚገባንም እናምናለን፡፡

9. በጌታችን በኢየሱስ ክርስቶስ ሞትና ትንሣኤ ተመሥርታ በመንፈስ ቅዱስ መውረድ በተገለጠችው የመንግሥቱ ልጆች ኀብረት በሆነች ሐዋርያት በሰበሰቧትና በትምህርታቸው በምትኖር በአንዲት ቤተክርስቲያን እናምናለን፡፡

10. በሙታን የሥጋ ትንሣኤ፣ በጻድቃንና በሕያዋን የመጨረሻው ፍርድ በዓለም ፍጻሜ እናምናለን፡፡

11. የመንግሥቱ ዜጎች በክርስቶስ የተሰጣቸውን የኃጢአት ይቅርታና በእርሱም በማመን የተቀበሉትን ድነት እንዲሁም ወደ መንግሥቱ ዜጎች መጨመራቸውን በሚመሰክሩበት በአብ በወልድና በመንፈስ ቅዱስ ስም በሚፈጸም ሥርዓት በአንዲት ጥምቀት እናምናለን ፡፡

12. ከአንድ አባት መወለዳችንን የአንድም ቤተሰብ አባላት መሆናችንን በሚገልጠው በጌታ የኅብረት ማዕድ የጌታንም ሞት ለማሰብ በሚያስችል ቅዱስ ቁርባን እናምናለን፡፡

ማስታወሻ፡- ለተጨማሪ ማብራሪያ የከሣቴ ብርሃን ሐዋርያዊት ኦርቶዶክስ ተሐድሶ ቤተክርስቲያን መሠረታዊ የመጽሐፍ ቅዱስ አሥተምህሮ የሚለውን መጽሐፍ ይመልከቱ፡፡